144
fāʿilātün fāʿilātün fāʿilātün fāʿilün
 
ʿĀşıḳa cānından ise vaṣl·ı cānān ṭatludur
Cümlesinden derd-mend olana dermān ṭatludur

Ġamze·i ẖūn-rīz·i cānān acıdubdur cānumı
Leblerine meyl idersem ṭañlamañ cān ṭatludur

Ḫadd ü ẖaṭṭuñ devridür yanub yaḳılsun ḳo göñül
Nev-bahār ü sebzeler vaḳtinde biryān ṭatludur

Vuṣlat umanlar duyar mı acısını fürḳatüñ
Ṭālib·i gevher olana baḥr·i ʿUmmān ṭatludur

Ārzū·yi būse itsem ol şeker-leb diş ḳıṣar
Bellüdür cām·ı şarāb·ı nāb pinhān ṭatludur

Devr·i ḥüsnüñde maḳām iden ser·i kūyuñ yeger
Nev-bahār u ʿişret·i ṣaḥn·ı gülistān ṭatludur

Ġamzeñ oḳları yaġarken cān virürin ölmege
Her kişi anı bilür kim ẖāb·ı bārān ṭatludur

Rāh·ı ʿışḳuñda senüñ peykānuña cān virdügüm
Bu ki Kaʿbe yollarında ḥabb·ı rümmān ṭatludur

Bāde şīrīn leblere öykündügini işidüb
Acısındandur didügi laʿl ü mercān ṭatludur

Maʿrifet virmez Necātī cāhile fāẖir libās
Kimse dimez rengine baḳub zaʿafrān ṭatludur
 
 
Ali Nihad Tarlan, Necāti Divanı -