Fâ`ilâtün fâ`ilâtün fâ`ilâtün fâ`ilün
1 Zülfüne baglandı dil zencîre hâcet kalmadı
Kaldı ol uslanmadan tedbîre hâcet kalmadı
2 Karşu vardum şol kadar şemşîrüne nâz eyledün
Nâzun öldürdi beni şemşîre hâcet kalmadı
3 Derd-i aşkun bir dükenmez genc imiş ey şâh-ı hüsn
Ana vâsıl olalı iksîre hâcet kalmadı
4 Kaşlarun kavs-i kazâ her bir müjen tîr-i belâ
Devr-i hüsnünde kemân u tîre hâcet kalmadı
5 Heybet-i aşk urdı Yahyâ agzına mühr-i sükût
Yâr bildi hâlini takrîre hâcet kalmadı
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
