FāǾilātün FāǾilātün FāǾilātün FāǾilün
(47/b)
1. Zülfüñ añsam micmer-i ten misk ü Ǿanberden ŧolar
LaǾlüñ emsem kūze-i dil āb-ı sükkerden ŧolar
2. Her seĥer laǾlįn-ŧabaķla zer-nişān eyler saña
Eşk-i çeşmüm gibi gül kim jāle-i terden ŧolar
3. Dāne-i eşkümle pürdür çihre-i zerdüm benüm
Er çerāġıdur dem-ā-dem sįm ile zerden ŧolar
4. Bezm-i ġamda cām-ı laǾl-i dil-beri yād eylesem
Sāġar-ı çeşmüm mey-i yāķūt-ı aĥmerden ŧolar
5. Başuma odlar yakarsa ŧañ mı efkār-ı ħaŧuñ
Ķubbe-i gerdūn žalām-ı şebde aħterden ŧolar
6. Bāķį kim vaśf eyleye dendānuñ ile laǾlüñi
Ĥoķķaveş anuñ dehānı dürr ü gevherden ŧolar
Beyhan KESİK, BİR YAZMADAN HAREKETLE BÂKÎ’NİN YAYIMLANMAMIŞ ŞİİRLERİ, Turkish Studies - International Periodical For The Languages, Literature and History of Turkish or Turkic Volume 7/1 Winter 2012, p.1489-1500 , TURKEY
