Zülf-i siyâh kaydına düşmek cünûn imiş
Hâl-i ruhu derûnlara dâğ-ı derûn imiş
Zann eyledim ki perçemi mestûrdur anın
Her târı başka başka meger ser birûn imiş
Ferhâd-ı kûhsâr-ı cefâ olma bîhûde
Şîrîn-zebânın ahdlari bî-sütûn imiş
İmân za’fı varken o bütde ne fâide
Ser-pençe-i nigâhına Rüstem zebûn imiş
Eglencedir murâdı hep ol çeşm-i sâhirin
Efsâne-i mahabbeti ayn-ı füsûn imiş
Feyz-i nazardan olmuş idi rûyu nev-bahâr
Ol bâga âb u reng veren eşk-i hûn imiş
Gâlib tevakku’ etme vefâsın bu gülşenin
Nakş-ı hayâl sûret-i hestî-nümûn imiş
Feyz-i nigâh-ı hazret-i Sâkıb’dan iste hâl
Sırrı anın muhît-i zuhûr u bütûn imiş
https://ekitap.kulturturizm.gov.tr/Eklenti/10654,metinpdf.pdf?0
