mefâ’îlün mefâ’îlün mefâ’îlün mefâ’îlün
1 Yine senden saña ey şâh-ı hûbânum şikâyet var
Seni çok sevdigümçün bende de gerçi kabâhat var
2 Yıkılmaz zûr-ı seyl-i bâde vü cûş-ı sirişkümden
Binâ-yı muhkem-i vuslatda ol rütbe metânet var
3 Virür habb-ı tahammül şerbet-i sabr u sükûn yohsa
Dimez hikmet-şinâsân haste-i ‘aşka ifâkat var
4 Begüm senden cüdâ hiç sorma hâl-i nâbe-sâmânum
Gözümde eşk-i hûnîn ü lebümde âh-ı hasret var
5 O ‘âşık kim ola başında sevdâ-yı ser-i zülfüñ
Serinde sâye-i zıll-ı hümâ-yı ‘izz ü devlet var
6 Gül-i her-dem-bahâr-ı şevki görmez hiç hazân Pertev
Hevâsında cünûn iklîminüñ bir başka hâlet var
Dr. Ekrem Bektaş, MUVAKKİT-ZÂDE MUHAMMED PERTEV DÎVÂNI, Malatya-2007, https://ekitap.kulturturizm.gov.tr/Eklenti/10630,muvakkitzade-pertevpdf.pdf?0
