Mef‘ûlü Mefâ‘îlü Mefâ‘îlü Fe‘ûlün
1 Ye’cûc-i gamuñ def‘ine ey âyine-manzar
Gitme kerem it bezmde ol sedd-i Sikender
2 Meclisde gerek şem‘ ü surâhî gibi ol şâh
Otura gümiş sandalî üzre ura lenger
3 Dîdâruña müştâk u safâlı idi sırdan
Sen bakmayalı âyinenüñ hâli mükedder
4 Nâmem iletür sanma rakîbâ o hümâya
Döker perini kûyına vardukca kebûter
5 Kılmış el uzunlugını bu sünbül-i serkeş
Destini kesüp anuñ içün dâra çekerler
6 Görse seni bu sûret ile dir idi ‘İsî
Vallâhi hele hak bu durur rûh-ı musavver
7 Ger dirse sözüñ rûhını söylerdi Mesîhî
Gâyet eyüdür Sun‘i sözüñ rûhını söyler
YRD. DOÇ. DR. HALİL İBRAHİM YAKAR, GELİBOLULU SUN‘Î DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3197 KÜLTÜR ESERLERİ, Gaziantep
