Fe‘ilâtün Fe‘ilâtün Fe‘ilâtün Fe‘ilün
 
1 Yârun etvâr-ı perîşânını bilmez degülüz
 Hande-i çâk-ı girîbânını bilmez degülüz
 
2 Deheninden haber alduk biz o nahl-ı nâzun
 Lezzet-i sîb-i zenahdânını bilmez degülüz
 
3 Güni togmış gibi kevkeblice dildâdelerün
O mehün dün gice yârânını bilmez degülüz
 
4 Behremend itdügüni gül gibi kanın kurudur
Felegün görmişüz ihsânını bilmez degülüz
 
5 Anlaruz demm-i sürûr ile gam-ı dildârı
 Sohbetün yolını erkânını bilmez degülüz
                                                           
6 Tîre bahtânı bile Hüsrev-i hâver geçinür
Şu‘arâ zümresi ‘unvânını bilmez degülüz
 
7 Çeşm-i bîmârı hakîmâne dimiş Âgâhun
Bilürüz derdini dermânını bilmez degülüz
 
 
 
Dr. ŞERİFE AKPINAR’ ÂGÂH (Semerkândî-i Âmidî) DÎVÂN, KÜLTÜR VE TURİZM BAKANLIĞI KÜLTÜR ESERLERİ 502  2012,