[mef’ûlü fâ’ilâtü mefâ’îlü fâ’ilün]
1 Yârüŋ hayâli dilde ki her ân gelür geçer
Beŋzer şu hânkâha ki mihmân gelür geçer
2 ‘Ömr-i ‘azîz tende ki her dem revân olur
Döndi ribât-ı köhneye kervân gelür geçer
3 Pâk it sarây-ı kalbüŋi geldi hayâl-i yâr
Şâd ol dilâ ki tahtına sultân gelür geçer
4 Bend eyledüm kafama siper ey kaşı kemân
Korkum budur ki sîneme peykân gelür geçer
5 ‘Ayş it nisâr kıl zerüŋ ey nergis-i çemen
Bir göz yumup açınca bu devrân gelür geçer
6 Cevr itme baŋa gırre olup ân-ı hüsnüŋe
Bu behcet ü melâhat ü ol ân gelür geçer
7 Çeşm-i zamâne görmedi Rahmî nazîrüŋi
Gerçi ki dehre niçe sühandân gelür geçer
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,
