fāʿilātün fāʿilātün fāʿilātün fāʿilün
 
Yanma ey dil derd·i hicrāndan der·i cānāna gel
ʿArẓ·ı ḥāl itmek dilerseñ ḥaẓret·i sulṭāna gel
 
Ey ġam·ı dil-ber dilerseñ almaġa cānum benüm
Gitme dilden bir nefes genc isteyu vīrāna gel
 
Didüm ey cān dönmezem tīr·i müjeñden mā-ḥaṣal
Didi kim daʿvāyı ḳo ger merd iseñ meydāna gel
 
Gice zülfüñden şikāyet idicek cān cevrine
Didi ṣabr it ṣubḥa dek sulṭān çıḳar dīvāna gel
 
Ey nigār·ı seng-dil raḥm it Necātī bendeñe
Kāfir iseñ ẓulmi ḳo şimdengirü īmāna gel
 
 
 Ali Nihad Tarlan i, Necāti Beg Divanı, Istanbul: Milli Eğitim Basımevi, 1963);