Mef`ûlü Fâ`ilâtü Mefâ`îlü Fâ`ilün
1 Yâd-ı lebüñ ki câna virür bir dem-i tarab
Virmez o neşveyi mey-i câm-ı Cem-i tarab
2 Bâg-ı `ademde itmek içün `ayş-ı câvidân
La`li gamın idindi göñül hem-dem-i tarab
3 Sun destüme o sübha-i mercânı sâkiyâ
Şâd ola tâ ki rûh-ı revân-ı Cem-i tarab
4 Bir nîm-nâz-ı lutf-ı tebessümle ol perî
Gâret-ger-i dil oldı idüp mahrem-i tarab
5 Bîdâr olınca çeşm-i nigeh-mesti hâbdan
Olur küşâde mey-gede-i `âlem-i tarab
6 Dil la`l-i hande-bahşına olınca âşinâ
Hercâyî oldı hâtıra gelmez gam-ı tarab
7 Ol Kays-ı `ışk-ı Leylî-i hüsnem ki Nâmî-veş
Gelmez kenâr-ı sohbetüme mâtem-i tarab
Yard. Doç. Dr. Ahmet YENİKALE AHMET NÂMÎ DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ
