Mefâ`îlün mefâ`îlün mefâ`îlün mefâ`îlün
1 Vücûdum mülkinün aşk oldı sultân-ı cihânbânı
Derûn-ı sîne dârü's-saltana dil taht-ı sultânî
2 Güzeller leşkerinün nev-cevânum pâdişâhıdur
Ola hem leşkerün hem pâdişâhun Hak nigehbânı
3 Hemîşe gül nihâlinde ider çün âşiyân bülbül
Nola ârâmgâh itse dil ol çâk-ı girîbânı
4 Gönül geç vuslat-ı dil-dâr ümîdinden ne mümkindür
Çeker pehlûya bir nâ-çîz zerre mihr-i rahşânı
5 Cevân-ı nüktedân elbette kendin sevdirür Yahyâ
Hiç âdem sevmemek olur mı mahbûb-ı suhan-dânı
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
