Mefâ‘îlün Mefâ‘îlün Mefâ‘îlün Mefâ‘îlün
1 Vifâk-ı gayrdan geç düşmen olsun meh-likâ olsun
Ne var hârun vefâsında gül olsun bi-vefâ olsun
2 Hevâdan nem kapar giryânlıga çeşm-i ter-i ‘âşık
Degül muhtâc nakş-ı mûsikîye nakş-ı pâ olsun
3 Ser-i kûyunda cism-i nâ-tüvân hâk oldı yetmez mi
Dahı bilmem ne olsun sürme olsun tûtiyâ olsun
4 Garaz rif‘at-me’âb olmakdan ihsândur za‘îfâne
Nihâl-i bî-semer isterse bî-neşv ü nemâ olsun 4b
5 Mahabbet - hırka-pûşı atlas-ı eflâke nâz eyler
Olursa fakr-ı zâhir gam degül dilde gınâ olsun 5b
6 Ne benden âh-ı âteşbâr u ne senden bana âzâr 6a
Dönen sözinden ey gerdûn-ı keç-rev âsiyâ olsun
7 Senün yetmez mi hüsnün gülşeninde nagme-senc Âgâh
Dü-sad zâg olmasun bir ‘andelîb-i hoş-nevâ olsun
Dr. ŞERİFE AKPINAR’ ÂGÂH (Semerkândî-i Âmidî) DÎVÂN, KÜLTÜR VE TURİZM BAKANLIĞI KÜLTÜR ESERLERİ 502 2012,
