Mef‘ûlü/ Fâ‘ilâtü/ Mefâ‘îlü/ Fâ‘ilün
Vasf-ı ruhuñda dindi Cemâlî gazelleri
Râ kâşuña okındı Hilâlî gazelleri
Sâkî meger ki câm-ı lebüñ medh ider senüñ
Devr itdi bezm-i ‘âlemi Vâlî gazelleri
342
Kevser lebüñ ümîdine ey hûrî-i behişt
Vird-i zebânum oldı Zülâlî gazelleri
Gâh agladur gamuñda beni gâh güldürür
Cânâ Firâki şi‘ri Visâlî gazelleri
Medh eyledi meger ki senüñ lutf u tab‘uñı
İrdi kemâl-i lutfa Kemâlî gazelleri
Vasluñ nevâli yâduma geldükce yazılur
Mecmû‘a-i göñülde Nevâlî gazelleri
Ravzî gam-ı firâk-ı nigârumda dem-be-dem
Eglence oldı baña Hayâlî gazelleri
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
