- - . / . - - . / . - - . / . - -
1.‘Uzlet-gede-i ‘aşka dili cân ile gönder
Ol hân-kâha hastañı kurbân ile gönder
2.Nûş eyleyüp ol mug-peçe ‘aşkına şarâbı
Ey sûfî yüri tövbeyi îmân ile gönder
3.Etfâl üşüp vâdi-i hicrâna düşürsün
Mecnûn-ı dili şevket ü ‘unvân ile gönder
4.Cânân ile cân dil-ber ile dil gider olmış
Gel cismi dahi eşk-i firâvân ile gönder
5.Egletme hemân kâfile-i ‘aklı ‘Atâyî
Câmı pür idüp meş‘al-i rahşân ile gönder
Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994
