Dîvân-ı İlâhîyât 150
Terkîb olundu çünki hevâ hâk ü nâr ü âb
İnsân-ı kâmil oldu ana ref' olup hicâb
Hullet ki nârı nûr ede berd ü selâm olur
Âşık ki sâdık ola ana azb olur azâb
Bahr-i atâsı nehr ede haşa ki sâ'ili
Derd-i derûna şâfî iken lutf ile cevâb
Vaslın hevâsına gezer âvâre (ebr ü bâd)
Pervâne şem'-i aşkına (eflâk ü âfitâb)
Kesret tılısmı mâni' olup genc-i vahdete
Hayretde kaldı hasret ile nice şeyh ü şâb
Ref' et hicâbı lutf et (enâniyyeti) gider
Gayb-ı hakîkat açıla tâ ola feth-i bâb
Bâkî hayâta ermeğe ihsânın isteriz
Lutf et Hüdâyî bendene yâ Mâlike'r-rikâb
