[216]
Mefâ`îlün Mefâ`îlün Mefâ`îlün Mefâ`îlün
1 Temâşâ-yı dil-i zâra hat-ı ruhsâr olur mâni`
Nitekim `andelîbe vasl-ı gülde hâr olur mâni`
2 Tebessüm ruhsat izhâr eyledükçe bûs-ı la`line
Çeker şemşîr-i nâzı gamze-i hûn-hâr olur mâni`
3 Nice mümkin baña seyr eylemek gül-bâğ-ı dîdârı
Nigâh itsem hücûm-ı eşk-i deryâ-bâr olur mâni`
4 Yine hâyil kabâ-yı cismidür `âşıklaruñ yohsa
Visâl-i dil-rübâya sanmañuz agyâr olur mâni`
5 Sakın sûz-ı derûn izhârını dildârı gördükçe
Nigâh-ı âşinâ-îmâya âh u zâr olur mâni`
6 Hücûm-ı hırs-ı nezzâre çekerken dîdeye perde
Yine seyr-i `izâra zülf-i miskîn-târ olur mâni`
7 Der-âgûş-ı miyânın lutf ider Nâmîye ammâ kim
Komaz zerrîn kemerle hançer-i zer-kâr olur mâni`
Yard. Doç. Dr. Ahmet YENİKALE AHMET NÂMÎ DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ
