157
Fâ‘ilâtün Fâ‘ilâtün Fâ‘ilâtün Fâ‘ilün
1 Tâze tâze dâglar ile hâksâr oldum yine
Güller ile zeyn olınmış bir mezâr oldum yine
2 Açdı cennet revzenin ravzamdaki güller benüm
Haşr olınca hûrîlerle hem-civâr oldum yine
3 Hân-ı rahmetle tolı her gül tabakdur nûrdan
Hamdüli’llâh şimdi zayf-ı Kirdgâr oldum yine
4 Nûrdan kandîllerdür asılur her verd-i ter
Türbetüm oldı münevver kâm-kâr oldum yine
5 Tañ degüldür yüz sürer ey dil melekler hâküme
Tâ kıyâmet ehl-i kabre iftihâr oldum yine
6 Meşhedüm biñlerle ol kanlu kefenden haymedür
Ben şehîd-i ‘ışk olana tâcdâr oldum yine
7 Câm-ı rengîn oldı her bir gül serâ-yı kabrüme
Sun‘iyâ ehl-i mezâra şehriyâr oldum yine
YRD. DOÇ. DR. HALİL İBRAHİM YAKAR, GELİBOLULU SUN‘Î DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3197 KÜLTÜR ESERLERİ, Gaziantep
