TAHMİS
Fâ’ilâtün Fâ’ilâtün Fâ’ilâtün Fâ’ilün
Kâgız alsam yazup i‘lâm itmek içün hâletüm
Nûr ider fi‘l-cümleten elümde nâr-ı fürkatüm
Varup oñmazın niçe ‘arz eylesem kim hâcetüm
Söylemek kasd itdügümce yâra derd ü hasretüm
Aglamak tutar beni güftâra kalmaz kudretüm
Kıldı eflâke ser-â-ser peyk-i âhum cûst-cû
Vardı eşküm yokladı baht-ı serâyı sû-be-sû
Ben sabâha deñlü sürdüm işigi hâkine rû
Görmedüm ol mâhı çok bakdum aşaga yukaru
Yerde gökde yıldızum yokdur gidüpdür devletüm
Ger firâkuñla kalup aslâ visâle irmeyem
Bezmgâh-ı lutfuña iller gire ben girmeyem
Ser bedenden ayıram dil ışkdan ayırmayam
Ben niçe sen şem‘-i tâbâna revân cân virmeyem
Yok mıdur ‘âlemde bir pervâne deñlü gayretüm
İhtiyâcum yok livâya âh-ı âteşnâkden
Çıkdı ‘asker mâcerâsı dîde-i nemnâkden
Şimdi itmişdür Süleymânlık baña eflâkden
Kûyına iltüp götürdi ben gubârı hâkden
Var durur yerden göge bâd-ı sabâya minnetüm
Ey Behiştî bende kim çekdi dil-i abdâlumı
Yâ niçe Leylî-sıfatdan hıl‘at aldum şâlumı
Kâl u kîl ehli ne fehm eyler benüm akvâlümi
Rûz-ı mahşerde diyem Mecnûn’a Ca‘fer hâlümi
Kim dilümi ol bilür ancak ol añlar hâletüm
Dr. Yaşar AYDEMİR, BEHİŞTÎ DÎVÂNI, https://ekitap.kulturturizm.gov.tr/Eklenti/10597,behistipdf.pdf?0
