Fâ`ilâtün fâ`ilâtün fâ`ilâtün fâ`ilün
1 Sûz-ı dilden bî-haberdür sanmanuz cânâneyi
Şem`i yakmaz mı ol âteş kim yakar pervâneyi
2 Sâf-meşreblerle pür bir cây-ı hâlet-bahşdur
Zâhid-i nâ-dân velî hâlî sanur mey-hâneyi
3 Düşmesün elden inen nâzükdür olur münkesir
Bi'llâh ey sâkî gözet el üzre tut peymâneyi
4 Mülk-i dilde komadı ceyş-i sitem taş üzre taş
Kimse ma`mûr idemez bir dahı bu vîrâneyi
5 Virdi Yahyâ'ya tevâzu`la selâm ol şâh-ı hüsn
Hep pesend itdi gören bu vaz`-ı dervîşâneyi
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
