Subhgâh olmazdan evvel bülbülâ zâr etme sus
Gonca-i nâzikterdir hâbı bîdâr etme sus
2 Rûy-ı mahrem görmedim âyîne-i devrânda
Kimseye tûtî-zebânım keşf-i esrâr etme sus
3 Her ne denli çâk çâk-i hâr-ı sabr olsan yine
Gül gibi râz-ı derûnı halka izhâr etme sus
4 Sâbit olmak şâhidin eyle mukarrer olsa da
Tavr-ı bîrûn-ı edebdir cürmün ikrâr etme sus
5 Çün cezâ cins-i ameldendir bilirsin şüphesiz
Kimseyi rencîde-i düşnâm u âzâr etme sus
6 Vasf edip kâlâ-yı hüsnün ey büt-i kâlâ-fürûş
Zümre-i ehl-i dili lutf et harîdâr etme sus
7 Kalmamış kadr-âşinâyân-ı hüner Meşhûriyâ
Nâdire-gûyum diyü da'vâ-yı eş'âr etme sus
Yaşar AYDEMİR-Halil ÇELTİK, MEŞHURÎ DİVANI (Tenkitli Metin), T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3196 KÜLTÜR ESERLERİ, Ankara 2009
