414-
Fâ`ilâtün Fâ`ilâtün Fâ`ilâtün Fâ`ilün
1 Şöyle üşmiş diller ol çeşm-i siyeh-fâm üstine
Gûyiyâ etfâl üşer bir mest-i bed-nâm üstine
2 Vasf-ı çeşmüñ tañ degül yazsam marîz-i `aşk iken
Zahmet-i tebden yazarlar çünki bâdâm üstine
3 Haste-diller cân virürler vuslat-ı cânâneye
Kurılur derviş olanlar hân-ı in`âm üstine
4 Rast gelse lutf ile agyâra virürmiş selâm
Togrusı söylendi ol serv-i gül-endâm üstine
5 Ey Ziyâ’î içicek gam gitsün açılsun göñül
Yazalum vasf-ı leb-i cânânı bir câm üstine
Dr. Müberra GÜRGENDERELİ, MOSTARLI HASAN ZİYÂ’Î DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3195 KÜLTÜR ESERLERİ
