mefʿūlü fāʿilātü mefāʿīlü fāʿilün
Şol yār çünki ʿāşıḳa bīgāne olmaya
Ṭaşlamalıdur anı ki dīvāne olmaya
Kimdür ki bezm·i ḥüsnüñe cān ile baş ile
Bir şemʿ gibi yanmaġa pervāne olmaya
Şol şehr içinde ṭurma ki ḥāẕıḳ ṭabīb yoḳ
Bir daẖi şol maḥalle ki meyẖāne olmaya
Şenlik hemīşe künc·i ẖarābāt içindedür
Genc ola mı şu yerde ki vīrāne olmaya
Ḫaṭ mıdur ol ki çekmeye siḥr ile dāˀire
Beñ midür ol ki fitnede bir dāne olmaya
Ṣıdḳ ile şol ki beklemeye şāh yanını
Şaṭrenc·i mihr·i dōstda ferzāne olmaya
Oḳunmasun Necātī getürmez gözine dōst
Şol şiʿr·i dil-firībi ki mestāne olmaya
