Fâ`ilâtün fâ`ilâtün fâ`ilâtün fâ`ilün
1 Sohbet-i gül hurrem eyler bir iki gün bülbüli
Meclis-ârâlıklar eyler eglenür egler güli
2 Oldı gülşen bir cevân-ı kâmrân kim giydigi
Gâh gül-gûnî kabâ gâhi libâs-ı sünbülî
3 Şübhe yokdur kim çıkar bî-çâre diller başdan
Ol şehün tarf-ı külâhından çıkarsa kâküli
4 Sâgar-ı gülden nice mest oldı bülbül sâkiyâ
Vaktidür bizden dirîg itme meded câm-ı müli
5 Himmet-i sâkî olursa gamla söyleşmek nedür
Eksik olmasun hemân Yahyâ surâhî kulkulı
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
