[mefâ’îlün mefâ’îlün mefâ’îlün mefâ’îlün]
1 Şitâ ebri gibi diller yeter giryânuŋ olsun hep
Bahâr-ı hüsnüŋi ‘arz eylegil handânuŋ olsun hep
2 Gam-ı çeşmüŋle ölsem hâküm üzre açılan nergis
Gubâr-ı hattuŋa nâzır olup hayrânuŋ olsun hep
3 Leb-i havrâya misvâk ile sûfî diş biler ammâ
Baŋa cânâne besdür varsun ol nâdânuŋ olsun hep
4 Musahhir olmak isterseŋ gözüm ol yâr-ı rûhânî
Sirişküŋ dâne dâne sübha-i mercânuŋ olsun hep
5 Göŋül âyîne-i ‘âlem-nümâdur pür-mücellâ kıl
Nukûş-ı dehr andan Rahmiyâ seyrânuŋ olsun hep
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,
