Mefâ`îlün mefâ`îlün mefâ`îlün mefâ`îlün
1 Sirişki dânesin deryâ idince dem-be-dem dökdi
Gözüm tutdı o kebg-i hûb u hoş-reftârı yem dökdi
2 Degül dâg u elif ten safhasında kâtib-i mihnet
Başumda yazılan âlâmı cem itdi rakam dökdi
3 Gönüller mürgini gûyâ ki sayda dâmlar kurdı
Cemâli bâgına dil-ber ki zülf-i ham-be-ham dökdi
4 Döküldi gözlerümden katre katre eşk-i hûn-âlûd
Nihâl-i gussayum ezhârumı bâd-ı sitem dökdi
5 Dil-i pür-hûn ki bezm-i gamda kanlar agladı Yahyâ
Şu meste döndi kim câmını hem toldurdı hem dökdi
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
