Mefâ‘îlün Mefâ‘îlün Mefâ‘îlün Mefâ‘îlün(1)
1. Sıfâhân hâk-i pây-ı tûtiyâ-yı dilber olmışdur
Kara topraklıkdan şimdi çıkmış gevher olmışdur
2. Şu‘â‘-ı nâr-ı âhumdan hilâlüñ na‘li kızmışdur
Ufukda sanmañuz sürh-ı şafakdan ahmer olmışdur
3. Felek fülkin yaşum bahri alur giderdi bir yaña
Velîkîn dûd-ı pîç-â-pîç-i âhum lenger olmışdur
4. Duhân-ı nâr-ı âhum çarhı aglatmışdur ol deñlü
Ki eşki katresinüñ adı şimdi ahter olmışdur
5. Gözümde uçar ey Emrî hayâl-i zülfi şeh-bâzı
Bu merdüm sîne vü aña müjem bâl u per olmışdur
Prof. Dr. Mehmet A. Yekta SARAÇ, EMRÎ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3144 KÜLTÜR ESERLERİ 427
