[371]
Fâ`ilâtün Fâ`ilâtün Fâ`ilâtün Fâ`ilün
1 Seyre çıkmazdı nazar hüsn-i hayâlüñ olmasa
Pâydâr olmazdı dil va`d-i visâlüñ olmasa
2 `Andelîb itmezdi gül-şâhı vatan-gâh-ı nevâ
Feyz-bahşâ-yı tarab gül-berg-i alüñ olmasa
3 Künc-i gamda eglenilmezdi dil-i pür-derd ile
Safha-i hâtırda nakş-ı bî-misâlüñ olmasa
4 Cilvesi olmazdı servüñ hâlet-engîz-i safâ
Yâd-ı reftâr-ı hırâm-ı nev-nihâlüñ olmasa
5 Kim bilürdi lutf-ı hüsni ey büt-i `âlem-firîb
`Âşık-ı rüsvâ-pezîr âşüfte-hâlüñ olmasa
6 Yûsuf-istân-ı ma`ânî olmaz idi hâtırum
Mâye-i endîşe nakş-ı hatt u hâlüñ olmasa
7 Nükte-zây olmazdı kilk-i Nâmî-i şîrîn-edâ
Neşve-yâb-ı sâgar-ı vasf-ı zülâlüñ olmasa
Yard. Doç. Dr. Ahmet YENİKALE AHMET NÂMÎ DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ
