..-- / ..-- / ..-- / ..-
Seni gafletde komış nefs-i hevâ gel gözüñ aç
İddihâr it ‘amel-i zâdi olursañ muhtâc
Seni ferzîn-i felek bir gün ider âhir mât
Tutalum bâzi-i dünyâda imişsin hallâc
Hasret-i ni‘met-i envâ‘a ne bu hırs-ı segî
Pâre-i nân ki yitmez saña çün olduñ aç
Kendüñi tekye-zen-i tâk-ı zeberced itseñ
Tîr-i merg-i felek eyler seni bir gün âmâc
‘Abd-i ahkarsın eger bî- ‘amel iseñ ferdâ
Şark u garbdan saña tahsîl ola ger bâc harâc
Zîr-i tûbâ saña mesken ola mânend-i Sürûş
Sîneden lezzet-i heyvânı iderseñ ihrâc
Hüsn-i hulkı taleb it kendüñi sen eyle Sa‘îd
Bu gazel zulmet-i nefsüñde saña oldı sirâc
Saadet Karaköse, : Sa’id Giray Dîvânı, : © T.C. Kültür ve Turizm Bakanlığı Kütüphaneler ve Yayımlar Genel Müdürlüğü,2017 ISBN: 978-975-17-3636
