TAHMÎS-İ GAZEL-İ HAZRET-İ NEŞéET
fe’ilâtün fe’ilâtün fe’ilâtün fe’ilün
1
Şem’e zer efser ile nûr-ı hidâyet gelmez
Ser-fürû itmeyene rif’at ü devlet gelmez
Olsa pervâne melek mûma beşâret gelmez
“Tâc-ı ikbâl ile her ser-keşe rif’at gelmez
Fâhte olsa hümâ serve sa’âdet gelmez”
2
Nâ-pesendî göremem meslek-i rengînümde
Kahr u lutfuñ ikisin bir bilürem dînümde
Şâkir ü şâkî bulınmaz reh-i âyînümde
“Âb-ı tîg âb-ı Hızır bir leb-i temkînümde
Fârigam hâtıruma şükr ü şikâyet gelmez”
3
Olsa cennet gibi kâşânemüz âbâd yine
Bendemüz olsa da her bende vü âzâd yine
Genc-i bâd-âver-i tab’ itse de imdâd yine
“Nakd-i gencîne-i dil olsa da îrâd yine
Biz kalender-revişüz bizlere servet gelmez”
4
Cümle-i nâsda var tûl-i emel sevdâsı
Mütehayyir gerek a’lâsı gerek ednâsı
Hiç dükenmez bu ta’ayyüşle cihân gavgâsı
“Olsa mîzâb-ı ‘atâyâ-yı felek mecrâsı
Sebze-zâr-ı emel ü hırsa kanâ’at gelmez”
5
İdemem Hazret-i üstâzı esâtîze şerîk
Ki olınmış aña iklîm-i ma’ârif temlîk
Eyle bu beyt-i şerîfi ile Pertev tebrîk
“Sad hezârânı gelür gülşen-i ma’nânuñ lîk
Neşéegâh-ı sühana bir dahi Neşéet gelmez”
Dr. Ekrem Bektaş, MUVAKKİT-ZÂDE MUHAMMED PERTEV DÎVÂNI, Malatya-2007, https://ekitap.kulturturizm.gov.tr/Eklenti/10630,muvakkitzade-pertevpdf.pdf?0
