[mefâ’îlün mefâ’îlün mefâ’îlün mefâ’îlün]
 
1 Seher gün gibi dil-ber kendüyi her dem ‘ayân eyler
Kalan meh-rûları seyyâre-veş ol dem nihân eyler
 
2 Degül jûlîde mûlar görinen Mecnûn-ı ‘ışkam ben
Hevâ-yı murg-ı mihnet başum üzre âşyân eyler
 
3 Gözüm içre hayâlüŋ dil-berâ ‘aynıdur ol murguŋ
Ney içre dem-be-dem bahrüŋ kenârında mekân eyler
 
4 Tenümde zahm-ı tîguŋ içre peykânuŋ zebân oldı
Dehân açdı gamum âh eyleyüp her dem figân eyler
 
5 Egerçi sûretâ Rahmî gam u gussayla pîr oldı
Velî ma’nîde dâyim ‘ışk-ı dil-ber nev-cüvân eyler