Fâ`ilâtün fâ`ilâtün fâ`ilâtün fâ`ilün
1 Şeh-süvârum `azm kılmış yine sahrâ seyrine
Çıkmış ol şâhun temâşâdur ki dünyâ seyrine
2 Çeşmüme gel ey hayâl-i dost seyr it eşkümi
Bir müferrih gûşedür gel anda deryâ seyrine
3 Al ele âyîneni seyr it ruhun âyînesin
Meyl idersen misli yok mahbûb-ı zîbâ seyrine
4 Sahn-ı sînem gül gül itdüm tâze tâze dâg ile
Fasl-ı güldür gülşene gel verd-i ra`nâ seyrine
5 Cân çekişmekde ne var Yahyâ gelürse ol cevân
Tıfldur meyl eyleye şâyed ki gavgâ seyrine
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
