Mef`ûlü mefâ`îlü mefâ`îlü fa`ûlün
1 Şeb-nem gibi dil gonce-i handânuna düşdi
Yûsuf gibi cân çâh-ı zenahdânuna düşdi
2 Yüksekde uçardı katı şeh-bâz-ı dil âhir
Dâm-ı ser-i gîsû-yı perîşânuna düşdi
3 Her nire ki `azm eyledün ey serv-i revânum
Sâyen gibi üftâde gönül yanuna düşdi
4 Sarkar etegün öpmege ol kâkül-i miskîn
Lutf it koma ayakda ki dâmânuna düşdi
5 Yahyâ'yı nola eylesen ey şâh `iyâdet
Bî-tâb yatur pister-i hicrânuna düşdi
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
