Ol peri rû çeşm-i âhû mehlikâlar canıdır
Çeşm-i âhû zülfü hoş-bû cânımın cânânıdır
Mehlikâlar cânımın eğlencesi candan aziz
Cânıdır cânânıdır candan aziz mihmanıdır
Mübtelâ-yı derd-i aşkı ol perînin cism ü cân
Derd-i aşkı kim çekerse istemez mülk-i cihân
Ol perînin istemez üftâdesi bağ-ı cinân
Cism ü cân mülk-i cihân bağ-i cinân kurbânıdır.
Hal ü hattı nâzenindir her edâsı dil-rübâ
Nâzenindir şûh-ı mümtâz neş'edâr sâhip vefâ
Her edâsı neş'edâr âyine-veş ibret nümâ
Dil rübâ sâhip vefâ ibretnümâ ünvânıdır
Hamd-i bîhad tâzelendi sâyesinde bezm-i Cem
Tazelendi câm-ı gül-gûn zümre-yi âlî himem
Sâyesinde zümre-yi uşşâk bütün erbâb-ı dem
Bezm-i Cem âlî himem erbâb-ı dem meydanıdır
Ey HUZÛRÎ bârekallâh yazdı kâmil nazm-ı ter
Bârekallâh kadri vardır her sözün manend-i zer
Yazdı kâmil her sözün hikmette bir mûciz eser
Nazm-ı ter mânend-i zer mûciz eser divanıdır
Ali Rıza ÖNDER, Âşık Ali Huzurî Coşkun, Türk Folklor Araştırmaları, II (40), 11.1952, s. 640. / Hikmet DİZDAROĞLU, a.g.e., s. 143.
Aşık Huzuri Artvin Yusufeli Hayatı Edebi Kimliği
