Mefâ`îlün mefâ`îlün mefâ`îlün mefâ`îlün
1 Sarîr-i bâb-ı cennetdür nevâ-yı nây `uşşâka
Semâ` itsün sadâ-yı feth irişdi cân-ı müştâka
2 Dönerler mevlevîler `aşkdan nây urdıgınca dem
Nesîm-i nev-bahâr esdikce gerdân olan evrâka
3 Feleklerde meleklerde semâ` itmez mi kalmışdur
`Aceb âvâze saldı nây-ı Mevlânâ bu nüh tâka
4 Gönül bâgını hurrem itdi ey ney tîb-i enfâsun
Yayıldı nefha-i bâd-ı bahârî gibi âfâka
5 Cihânda nâydan hiç kimse incinmiş midür Yahyâ
Derûn hâli gerekmiş gayrdan tehzîb-i ahlâka
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
