[mefâ’îlün mefâ’îlün mefâ’îlün mefâ’îlün]
1 Şarâbı görse kaynar tende cânum yâr-ı cânumdur
Nihâl-i duhter-i rez hayliden hâtır-nişânumdur
2 Senüŋ dikmeŋ geçer kanlu hadengüŋ ey kemân-ebrû
Fezâ-yı bâg-ı sînemde nihâl-i ergavânumdur
3 Lebüŋ şeftâlusın degşürmek ister bâgbân-ı cân
Kekedür kim ham olmış tende sanmaŋ üstühˇânumdur
4 Komaz dâmânın elden kande gitse dûd-ı âhumdur
Düşen ardınca sanmaŋ sâye-i serv-i revânumdur
5 Ben ol murgam şikeste-bâl olur sanmaŋ havâdisden
Hevâ-yı vasl kılmaz hâr-ı hasret âşyânumdur
6 Bugün bir şûha dil virdüm görüp Dâvûdi-elhânın
Rumûz-ı ‘ışkı dilde Rahmiyâ vird-i zebânumdur
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,
