[fâ’ilâtün fâ’ilâtün fâ’ilâtün fâ’ilün]
1 Sâki-i bâkîden anlar kim kadeh-nûş oldılar
Tâ-ebed bezm-i fenâda mest-i bî-hûş oldılar
2 Sırr-ı vahdetden dem urdı pîr-i merdân-ı Hudâ
Katreler çün irdiler deryâya hâmûş oldılar
3 Sûret-i resm-i vefâ âyîne-i ‘âlemde yok
Gördi sâfî-diller anuŋçün nemed-pûş oldılar
4 Vasf-ı gülzâr-ı sıfât-ı zât-ı bî-çün itmege
Agız açdı gonçalar güller kamu gûş oldılar
5 Rahmiyâ irişdiler âhır bisât-ı kurbına
Ehl-i dil sanma yüz urup yire hâmûş oldılar
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,
