fâ’ilâtün fâ’ilâtün fâ’ilâtün fâ’ilün]
 
1 Şâhid-i gül üzre bülbül kim seher güler düşer
Jâleler eşküm gibi gördükçe anı ter düşer
 
2 Ser-keş olma tâc-ı devletdür melâhat hüsrevâ
Nice Dârâlar serinden gâh olur efser düşer
 
3 ‘Arsa-gâh-ı ‘ışkda merd ol ki tîg-i kahr ile
Nice serler hâksâr olup nice serler düşer
 
4 ‘Âşık-ı zâr u nizâr olmış seher hurşîd-i çarh
Tâb-ı mihr-i yâre döymez çarhdan ditrer düşer
 
5 Nukre-gûn efşân ile gül-gûn varakdur gûyiyâ
Şol ‘araklar kim ‘izâr-ı dil-bere yer yer düşer
 
6 Göŋlüme gelse dehânuŋ fikri dil nâlân olur
Bezmde gavgâ olur hâk üzre kim sâgar düşer
 
7 Gam degül nazmuŋ görüp nâ-ehl kılmazsa pesend
Gâh olur kim hâk-i râha Rahmiyâ gevher düşer
 
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,