361
Fâ‘ilâtün/ Fâ‘ilâtün/ Fâ‘ilâtün/ Fâ‘ilün
Bitdi ‘uşşâkuñ işi geldi ruh-ı cânâna hat
Ehl-i küfri itdi da‘vet ser-be-ser îmâna hat
Cân-ı ehl-i şevkı yakar tâb-ı ruhsâruñ senüñ
Ey tabîbüm çâre kılmazsa eger dermâna hat
Pâdişâh-ı mülk-i hüsn olmışdur ol her vech ile
Tañ degül zabt itmege gönderse her büldâna hat
‘Aks-i ebrû zâhir olmışdur kıl im‘ân-ı nazar
Geldi zann itmek neden la‘l-i leb-i mercâna hat
Okumag ister meger dîvân-ı hüsn-i dil-beri
Aldı mecmû‘a ele geldi yine seyrâna hat
Defter ü dîvân-ı şi‘re hüsn-i hatt-ı yârdan
Kıl nazar derc eyledüm seyr itmege yârâna hat
Ey melek-sîmâ kitâb-ı hüsnüñi yazmag içün
Gökden inmişdür disem olmaz ‘aceb handâna hat
Var mıdur bir hat ki hatt-ı mushaf-ı hüsnüñ gibi
Diyeler aña müşâbihdür hat-ı ‘Osmân’a hat
Ehl-i şarkuñ hâtırın yazmaga ey Ravzî meger
Şâh-ı Rûm irsâl ider Îrân ile Tûrân’a hat
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
