SADR-I AZAM MUSTAFÂ PAŞA HAZRETLERİNE ARZ OLUNAN KASÎDE-İ ÎDİYYEDİR
(Fâilâtün Fâilâtün Fâilâtün Fâilâtün)
1 Rû-nümâ oldukda şevvâlin meh-i rûşen-geri
Çerh-i îdiyye takındı bir müzerkeş hançeri
2 Makdem-i ferruh-dem-i teşrîfi ilbâs eyledi
Rûze-dârâna ser-â-ser sevb-i zîb ü zîveri
3 Şöyle pertev-bahş-ı sûr oldu cihâna îd kim
Dehri etdi zulmet-i şâm-ı küdûretden berî
4 Bâde-nûşân eyledi tertîb bezm-i işreti
Destine sâkî-i gül-ruhsâr aldı sâgarı
5 Âşık-ı dâg-âşinâ ol sîne-i sad-çâkine
Sardı merhem yerine kâfûr-i cism-i dilberi
6 Gûşe gûşe ihtizâzından o serv-i kadlerin
Gülşen-i Adn’e mümâsil rûy-ı arzın her yeri
7 Îdgâhda ben de cân atdım güzel seyrânına
Nâz ile reftâr eder gördüm o yerde bir perî
8 Vasfa âgâz edeyim bu matla-ı garrâ ile
Gördügüm ol mâh-peyker dilber-i hat-âveri
9 Nev-hatânın pür-halâvet bûse-i cân-perveri
Cümleden şîrîndir Şâm’ın nebât-ı sükkeri
10 Mû-be-mû dikkat edip her uzvuna etdim nigâh
Yok miyân-ı nâzikinden mâ-adâ noksân yeri
11 Hâl-i anber-bârı da bir başka dâg oldu dile
Nâr-ı ışkı micmer-i kalbimde yakdı anberi
12 Bin belâ-yı şermle dedim eyâ şûh-ı cihân
Hayf sad hayf eyledin mecnûn dil-i sevdâ-geri
13 Ömrümün varı efendim merhamet etsen ne var
Lezzet-i bûsenle olsam telhî-i gamdan berî
14 Sâye-i vaslında bir îd edelim bâri senin
Bûse-i lalin ola uşşâka bayram sükkeri
15 Bozma agzım dadını ey dilber-i şîrîn-edâ
Sun agız miski deyu bana o müşgîn benleri
16 Döndü o âfet dedi nakdîne-i laf istemem
Bî-ser ü sâmân olma vaslımın hâhiş-geri
17 Nakd-i zer lâzım hem-âgûşî-i vasl-ı dilbere
Yohsa fursat-cûy-ı vasl olma cihânda serserî
18 Yok mudur bir sana rifat-bahş-ı şân-ı itibâr
Böyle sen ey Haşmet-i şeydâ niçün kaldın geri
19 Bir efendim var felekde ki eyâ reşk-i melek
Gerd-i pây-ı rahşına çeşm-i kevâkib müşterî
20 Nâm-dâş-ı Fahr-i Âlem âsaf-ı deryâ-himem
Zîver-i sadr-ı kerem ehl-i dilin nam-âveri
21 Âfitâb-ı evc-i himmet mâh-tâb-ı madelet
Subhgâh-ı devletin hurşîd-i pertev-perveri
22 Âsumân-mesned melek-meşreb o deryâ-himmetin
Sandal olmaz keştî-i câhında çerhin çenberi
23 Ol rakam-senc-i mekârim ki devât-ı kadrinin
Hokka-i fîrûzesi gerdûn-ı encüm-zîveri
24 Himmeti bir zerre-i nâçîze verse takviyet
Sedd iderdi kûh-ı Kâfâsâ mehebb-i sarsarı
25 Ger vezân olsa nesîm-i lutfu sûy-ı gülşene
Açılır her deşne-i hâr üzre bir verd-i tarî
26 Âsaf-ı devrân ki bîm-i tîg-i sertîzi ile
Gamze-i dilber dahi terk itdi kâr-ı neşteri
27 Pertev-i cân-sûzu berk-i hırmen-i sûziş olur
Her ne dem alsa ele şemşîr-i âteş-peykeri
28 Nîzesi peyveste çerha şöyle bîm-i hâkden
Nâfesin bâlâya çekdi kubbe-i nîlûferî
29 Kâkül-i Zühre fetîli pertevi nûr-ı sabâh
Çerh-i mînâ-fâm gûyâ asma kandîl-i deri
30 Sâye-gîr-i himmeti balâ-nişînân-ı feleK
Vâye-dâr-ı nimet-i bî-minneti ins ü perî
31 Murg-ı ankâ şem-i bezm-i kadrinin pervânesi
Zülf-i havrâ gülşen-i ahlâkının sünbülleri
32 Gülistân-ı tabının gül-gonce-i mazmûnudur
Nagme-rîz-i hande eden bülbül-i şîven-geri
33 Nev-bahâr-ı himmeti vakt-i hazân bilmez nedir
Gülsitân-ı cûdunun dâ’im öter bülbülleri
34 Nâhun-ı tedbîrine vâbeste keşf-i mübhemât
Hall ider yek lahzada bin ukde-i müşkilleri
35 Zîver-i sadrâ cihân-kadrâ müşîrâ âsafâ
Ey serîr-i mülket-i lutfun şeh-i dâd-âveri
36 Mühr-i devlet zîver-i engüşt-i ikbâlin olup
Hâtemâsâ verdi nâmın fass-ı sadra zîveri
37 Olmadı dil-hâhım üzre vasf-ı zâtın neyleyim
Sen gibi memdûha mâlik olmadım çokdan beri
38 Sâ’im-i hicrân idim noksânıma etme nazar
Rûze-dârânın olur isyanı magfûr ekserî
39 İltifâtınla edersem îd-ber-bâlâ-yı îd
Neşve-i lutfunla def eylerse dil derd-i seri
40 Ben de nakd-i fikrimi evsâfına vakf eyleyip
Tevbe sad tevbe lisâna almayam ben dîgeri
41 Başımın tâcı efendim gayri fikr etmek muhâl
Bad-ez-în yâd etmezem evsâf-ı hüsn-i dilberi
42 Sen gibi zâta medîha-gûy olan şâir hele
Hiç tenezzül mü eder fikr ü hayâle âheri
43 Dürr-i nazmı sen bilirsin nakd-i lutfu ben kulun
“Kadr-i zer zer-ger şinâsed kadr-i gevher gevherî“
44 Gitmiş idi senden evvel sûk-ı nazmın revnakı
Başka kâra başladı ehl-i maârif ekserî
45 Bir varak-pâre dahi girmezdi dest-i ragbete
Nüsha-i mergûbeler olmuşdu bakkal defteri
46 Şâirân enser keserdi sahn-ı dîvân-hânede
Şire gâlib idi ol dem sanat-ı âhengerî
47 Şimdi devrinde revâcın buldu bâzâr-ı kemâl
Gûşe gûşe gezmesin erbâb-ı irfân serserî
48 Vâdî-i vasfında gelsinler temâşa edelim
Her biri alsın ele kilk-i belâgat-perveri
49 Ben kulun da arz-ı kâlâ-yı maârif eyleyim
Olayım devrinde bâzâr-ı sühan şehbenderi
50 Medh ederse yine tab-ı nükte-dânım medh eder
Zât-ı pür-cûdun gibi bir ârif-i sad-ahteri
51 Husrev-i nazmım deyu davâ edersem yaraşır
Bana kaldı tahtgâh-ı mülket-i dâniş-verî
52 Rub-ı meskûn-ı maârif kabza-i fazlımdadır
Tîg-i kilkim kâr-zâr-ı müşkilâtın safderi
53 Zerrece nûr-ı tulû-ı mihr-i tabımdır benim
Pertev-efrûz-ı hayâl-i Unsurî vü Enverî
…………..
Haz.: Dr. Mehmet Arslan-İ. Hakkı Aksoyak, Haşmet Haşmet Külliyatı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3199 KÜLTÜR ESERLERİ
