4.
Berây-ı Tehniyet-Kudûm Hazret-i Sadr-ı A‘zam Nâsuh Pâşâ’ya Virilmişdür
. - . - / . . - . / . - . - / . . –
1.Sehergeh Âsaf-ı sâhib-kırân-ı ‘Osmânî
Müşerref eyledi kudûmıyla sadr-ı dîvânı
2.Ayagı tozı ile geçdi mesned-i câha
Münevver eyledi hakkâ ki çeşm-i a‘yânı
3.Görünce savlet-i merdânesini şîr-i felek
Sarardı havf ile beñzinde kalmadı kanı
4.‘Aceb mi sulha boyun virse hasm-ı gerden-keş
Çün oldı aracı ortada tîg-i bürrânı
5.Derâ-yı üştür-i ‘azmi münebbih oldı meger
Uyardı dîde-i pür-hâb-ı baht-ı erkânı
6.Usûle uydı ‘acem tutdı eski kânûnı
Salınca ‘âleme âvâze şevket ü şânı
7.Metâ‘ vü mülki ile germ-i pîle-veş âhir
Musahhar eyledi tedbîri Şâh-ı İrânı
8.Zamân-ı emn ü emân irdi ‘ahd-i ‘adlinde
İder bu ‘ahd ü emân şâd ehl-i îmânı
9.Gül-i nev-âmede-i gülsitân-ı devletdür
Dil ehli olsa nola ‘andelîb-i hoş-hânı
10.Çemende mutrıb-ı bülbül nevâ-yı mehdin okur
Gülüñ defin nola pür kılsa ebr-i nîsânı
11.Olurdı atlas-ı gerdûn sezâ-yı pây-endâz
Urılsa ger aña tamga-yı na‘l-i yekrânı
12.Gül-i murâd biter kande kim sala sâye
Nihâl-i bâr-ver-i kâmet-i hırâmânı
13.‘Aceb degül mi bu kim bâg-bân-ı lutfı anuñ
Müdâm sâyede besler gül-i gülistânı
14.Sa‘âdet ol şeh-i devlet-karîne kim bahtı
Mukârin eyledi sâhib-kırân-ı devrânı
15.Vezîr-i şâh-nazar Âsaf-ı Süleymân-fer
Müşîr-i hûb-siyer lâyık-ı cihâniyânı
16.Her ne bir kûh-ı vegâ şîr-i bîşe-i heycâ
Dilîr-i ma‘reke-ârâ Tehem-ten-i sânî
17.Hidîv-i Gîv-salâbet Nâsûh Pâşâ kim
Çeker massâfına gelse peşîn peşîmânî
18.Ol âfitâb-ı cihân-tâb-ı nusret kim
Şu‘â‘-ı nîzesi âfâkı itdi nûrânî
19.Hıyâm-ı zerkeş ile tugı âsumân-ı sehâb
Sihâm-ı terkeş ile tîgi berk ü bârânî
20.Kıbâb-ı zer-‘alem-i çetri câmi‘-i şevket
Münâdîdür iki yanında tuğ-ı sultânî
21.Harîm-i bezmine çârûb inâka-ı hüsrev
‘Aceb mi eylese ferrâşe târ-ı hâkânî
22.Vegâda zer ‘alemin çûp-ı nîze üzre gören
Sanur ki nîze kadar çıkdı mihr-i rahşânı
23.Sahîl-i esbini nâ-geh işitse ma‘rekede
Bıraga havf ile teb-lerze şîr-i gurrânî
24.Musahhar olsa nola hükmine rikâb-ı umûr
Dü-şâha urdı aña gülüñ ‘anber-efşânı
25.Olurdı mühresi nâfe şikeste pâresi ‘ûd
Tokınsa serv-i revâna nesîm-i ihsânı
26.İderdi zevrak-ı nüh-bâd-bân-ı çarhı şikest
Getürse sarsar-ı kahrı hurûşa ‘ummânı
27.Kalurdı hâme-sıfat hasr olup tekellümden
Dil itse vasf-ı vekârında menkabet-hânî
28.Katâr-ı ebr-i bahâr u şihâb ile keyvân
Revâ budur ola hargâhınınuñ şütür-bânı
29.Gül ile urmadı devrinde kimseyi kimse
Meger ki gülbün-i gül ‘andelîb-i nâlânı
30.Nigâh-ı merhamet ümmîd ider zamânında
Gazâl-i bâdiyeden nere şîr-i gurrânı
31.‘Ulüvv-i süllem-i kasr-ı celâline nisbet
Kemîne pâyesidür kürsi-i Nerîmânî
32.Geçerdi cânına tâb-ı eşi‘a-ı tîgi
‘Adû göreydi vegâda o mihr-i rahşânı
33.Semendinüñ ayagı mîl-i hâlgâh oldı
Ser-i ‘adû-yı bed-endîş gûy-ı galtânı
34.Urıldı edhem-i şâha hilâlden tamga
Meger tavîle-i kadrinde oldı yekrânî
35.Konulsa levh-i zer-i mihre şeb-çerâg kamer
Licâmına şafak olmaga olmaz erzânî
36.Keşef gibi nice baş göstere zamânında
Ki koydı koz kabına ehl-i zulm ü tugyânı
37.Ne yüzla da‘vâ-yı merdî ider ki şâh-ı ‘Acem
Virürdi sulh içün olsa yedinde biñ cânı
38.Revâ budur ki gelüp itdi tugını cârûb
Ola bu resm ile ferrâş-ı sahn-ı meydânı
39.Sahâda nice berâber tutar anuñla felek
Ki basdı pençe-i kahrı kef-i zer-efşânı
40.Yiter zemîne sehâb-ı kef-i zer-efşânı
Dökerse dürrini deryâya ebr-i nîsânı
41.Müşîr-i şîr-dilâ Âsaf-ı Hüdâvendâ
Eyâ vezîr-i cihân-gîr-i mülk-i ‘Osmânî
42.‘Atâyî bende-i dîrîne-i kemîneñdür
Mahaldür aña iderseñ nigâh-ı ihsânî
43.Zemânede benem ol şâ‘ir oğlı şâ‘ir kim
Baş egdi nazmuma dünyânuñ ehl-i ‘irfânı
44.Hezâr-hâce debistân-ı fazlumuñ tıflı
Tufeyl-zâde-i tab‘um hezâr-ı Hâkânî
45Hizâne-hâne-i nazm oldı mülk-i mevûsum
Musahhir-i kalemüm hıtta-ı suhan-dânî
46.İderdi âyine vaz‘ında anı pîş-nihâd
Safâ-yı tab‘umı görse hakîm-i Yûnânî
47.Velî ne çâre cefâ-yı felekle ehl-i dilüñ
Yiriyle kalmadı sabr u karâra dermânı
48.Nevâ-yı nâle vü savt-ı figânum ile benem
Riyâz-ı ma‘rifetüñ ‘andelîb-i nâlânı
49.Niçe zamân idi kim devr-i çarh-ı kej-reftâr
Gubâr-ı gam ile virdi baña perîşânî
50Zemîne resm-i cefâda zemâne olmış idi
Olurdı geçdügi nakşuñ dil ehl-i hayrânı
51.Yed-i cefâ ile der-beste idi genc-i murâd
Zemâne tîg-i tılısm itmiş idi harmânı
52.Elinden almaga sa‘y eyler idiler yolda
Ricâ-yı lutf ile cerrâr tutdugı nânı
53.Satardı Yûsuf-ı Mısr olsa bir dilim nâna
Biri birini bu kaht-ı keremde ihvânı
54.Bu demde gonce-i dil dest-i rûzgâra düşüp
Bir olmış idi girîbânı ile dâmânı
55Hüdâ bilür ki ümîd-i bahâr-ı lutfuñ idi
Tutup turan o dil-efgâr-ı hâr-ı hicrânı
56.Kudûmuñ ile olurdum dile tesellî-bahş
Sevindürüp bu hoş-âmedle cân-ı nâlânı
57.Müdâm eyler idüm tıfl-ı şîr-horde gibi
Nevâ-yı medhüñ ile medh-i sînede cânı
58.Hezâr-şükr-i Hüdâ kim emân-ı ‘adlüñ ile
Alındı çarhuñ elinden bu gün girîbânı
59.Koyup cefâyı felek i‘tizâra yüz tutdı
Ezelden itdügine gösterüp peşîmânî
60Yine fütâdelerüñ döndi üstine gerdûn
Zemîn el üzre tutar oldı ehl-i ‘irfânı
61.Dilâ çün eyleyesin bikr-i pâk-fikri ‘arûs
Sevâd-ı hatt-ı suhandur anuñ şebistânı
62.Şu nakşı it aña kilk-i güher-nisâr ile
Bakan revâ göre dâmâd-ı himmete anı
63.Simât-ı safhada hân-ı suhan çeküp andan
Du‘âya başla budur ‘âdet-i suhandânî
64.Hemîşe tâ ki çıkup âfitâb-ı ‘âlem-sûz
Gelüp nüvâziş ile güldüre gülistânı
65.Fürûg-ı ‘adli ile toslun âsumân u zemîn
Nesîm-i lutfı pür itsün sipihr-i gerdânı
66.Nehâr-ı devleti mahsûd-ı sâ‘at-i nev-rûz
Bahâr-ı ‘izzeti reşk-i riyâz-ı rızvânı
Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994
Nevizade Atai Nev'îzade AtâyiHayatı Eserleri
Nev'izade Atayi'nin Hamsesi Ve Hezliyat
