Mef'ûlü fâilâtü mefâîlü fâilün
 
1 Şâd olmadı ebed dil-i nâ-kâmımız bizim
Geçdi gam-ı cihân ile eyyâmımız bizim
2 Kaldık misâl-i seng-i nigîn zahm-ı dehr ile
Tutdu cihânı gerçi gidip nâmımız bizim
3 Hergiz şikârgîr-i emel olmadık dirîğ
Bu saydgehde kurulalı dâmımız bizim
4 Hiç rûy-ı neş'e olmadı görmek nasîbimiz
Bezm-i felekde devr edeli câmımız bizim
5 Meşhûriyâ bu kârgeh-i bî-bekâda hayf
Bir sûdu müntec olmadı ârâmımız bizim
 
Yaşar AYDEMİR-Halil ÇELTİK, MEŞHURÎ DİVANI (Tenkitli Metin), T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3196 KÜLTÜR ESERLERİ, Ankara 2009