1. Rûyun bezmde perde-keş-i haclet olmasın
Lutf eyle mihre zerre kadar minnet olmasın
2. Göstermez oldu la'lini ol hatt-ı nev sakın
Tahrîm-i hamra nâzil olan âyet olmasın
3. Ben kûh kûh derd olayım iştiyâk ile
Bâr-ı nigâh o şûha heman sıklet olmasın
4. Hûn-ı cigerle besleyeyim tek o gamzeler
Tâ böyle ser-girân-ı mey-i nahvet olmasın
5. Zahm urma bûy-ı gül dahı olursa âşıkın
Yelmân-ı tîğ-i nâza meded zahmet olmasın
6. Zinhâr bülbülün dahı tağlît-i hüsn ile
Gülbün tahayyül etdiği ol kâmet olmasın
304
7. Gîrâ eden o pençe-i müjgânı hep yine
Dilden rübûde eylediği tâkat olmasın
8. Geh bana nâz u gehi verir ruhsat-ı niyâz
Nâz eylemek niyâza da bir âdet olmasın
9. Aldı bu nazm-ı nev selefin nâmın ey Nedîm
Âsâyişinde ol sana hem külfet olmasın
MACİT, Muhsin, Nedîm Divanı, Akçağ Yayınları, Ankara 1997.
https://ekitap.kulturturizm.gov.tr/Eklenti/10635,nedim-divanipdf.pdf?0
