Fe‘ilâtün/ Fe‘ilâtün/ Fe‘ilâtün/ Fe‘ilün
 
Rûy-ı cânâna dilâ mushaf-ı ‘Osmân dirler
‘Ârızı hattına anuñ hat-ı reyhân dirler
Çekeyin gözlerüme pâdişehüm ihsân it
Ayaguñ topragına kuhl-ı Sıfahân dirler
Beni cevr ile helâk eyledigüñ yetmez mi
Eylemez kimseye şeh zulm-i firâvân dirler
Nâr-ı gayretle yanup ben niçe hâk olmayayın
Hâne-i gayra seni her gice mihmân dirler
Derd-i hicrânuñı çekmek katı gücdür bilürin
Tîg-ı bürrâna düşüp ölmegi âsân dirler
Dil-i âşüfte senüñ hüzn ile Ya‘kûb’uñdur
Mısr-ı hüsn içre saña Yûsuf-ı Ken‘ân dirler
Devlet ü ‘izzet ile pâdişehüm sen sag ol
Ravzi-i haste olur yoluña kurbân dirler
 
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009