(Fâilâtün Fâilâtün Fâilâtün Fâilün)
1 Ruhların ahşama karşu mey idince şule-tâb
Hacletinden yere geçdi bezm-i şebde âfitâb
2 Oldu her bir fıkra-i ışka bu levh-i sînede
Nokta-i dâgım nişân-ı surh-gûn-ı intihâb
3 Mevc-i reng-i bâdedir ser-rişte-i hâhiş dile
Dâne-i dâm-ı bütândır katre-i câm-ı şarâb
4 Nâr-ı fürkatden zebân-ı halkdan nâlendeyim
Zahm-ı sîh u tâb-ı âteşden enîn eyler kebâb
5 Âlem-i âb üzredir Haşmet esâsı neş’enin
Neşve-i mey ber-taraf keyfiyyet-i âlem ber-âb
Haz.: Dr. Mehmet Arslan-İ. Hakkı Aksoyak, Haşmet Haşmet Külliyatı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3199 KÜLTÜR ESERLERİ
