fe’ilâtün fe’ilâtün fe’ilâtün fe’ilün
1. Reng-i rûyunla olup müttehid eczâ-yi nigâh
Sûret-i şu’le-pezîr oldı heyûlâ-yi nigâh
2. Alma göz habsine ol Yûsuf-i hüsni ey dil
Ana zindân olur âgûş-i Züleyhâ-yi nigâh
3. Kuvvet-i câzibe-i hüsn-i gelû-sûzundan
Düşdi sîm-âb gibi ra’şeye a’zâ-yi nigâh
4. Hat degül eyledi mir’ât-i ruhun gerd-âlûd
Fart-i âmed-şud-i sad-fevc-i temâşâ-yi nigâh
5. Âb-i yâkût ile yazdı rakam-i şermi şikest
Safha-i ‘ârızuna kilk-i güher-zâ-yi nigâh
6. Olsa her mûy-i ten âbisten-i sad-nezzâre
Gelmez ey şûh bana yine tesellâ-yi nigâh
7. Kâle-i kesmehir-i (?) çâr-sûy-i nahvetdür
Ferş-i pây-i şeh-i hüsn olsa da dîbâ-yi nigâh
8. Yâd-i ruhsâre-i rengîn-i ‘arak-rîzün ider
Eşkümi revgan-i gül zarfını mînâ-yi nigâh
9. Sanma kim ber-zede-ruhsârdur ol meh Sâmî
Câ-be-câ zâhir olur nakş-i teh-i pây-i nigâh
(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0
