Mefâ`îlün mefâ`îlün mefâ`îlün mefâ`îlün
1 Olur gül gül kaçan şeftâlular alsam `izârından
Bu bâgun meyvesi evvel irişirmiş bahârından
2 Degüldür gûşvâr-ı la`l bir lü'lü`-yi lâlâdur
Görinür sürh yârün reng-i rûy-ı tâb-dârından
3 Şehâ pür-dâg sînem tâze tâze zahm-ı tîgünle
Bana yegdür cihânun gülşeninden lâlezârından
4 Iletdün bûy-ı zülfin nâfenün bagrını hûn itdün
O miskîni çıkardun ey sabâ âhir diyârından
5 Yatur deşt-i belâda tâb-ı gamdan teşne-leb Yahyâ
Içürmez mi o hûnı dahı tîg-i âb-dârından
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
