Dîvân-ı İlâhîyât 19
Gelin ey dostân isteyelim (sıdk ile) Mevlâ'yı
Olup ol matlaba tâlib koyalım gayrı sevdâyı
Hakîkat üzre eşyâyı görüp bilmek nasîb ola
Mecâzî mevce bakmayıp bulalım asl-ı deryâyı
Rızâsı Tûr'ına varan cemâli nûrunu gören
Hitâbı zevkine eren eder özge temâşâyı
Şular kim ehl-i kâl oldu seni bilmek muhâl oldu
Meğer aklı ikâl oldu kodu hayretde dânâyı
Geçip varlık hicâbından varan vahdet sarâyına
Erişir Kâbe kavseyn'e bilir sırr-ı Ev-ednâ'yı
Hüdâyî'ye bu yollarda hidâyet rehber olursa
Olur maksûduna vâsıl bulur lâ-büd müsemmâyı
Aziz Mahmud Hüdayi
