Mef`ûlü mefâ`îlü mefâ`îlü fa`ûlün
1 Ol mâh-likâ zülf-i siyehkârını çözdi
San Çîn ü Hıtâ tâciridür bârını çözdi
2 Bir ak güli eyledi bir tıfl perîşân
Dil-ber ki alup destine destârını çözdi
3 Encüm tagılup sanma tulû` eyledi hûrşîd
Ol sîm-beden tügme-i zer-târını çözdi
4 Müjde idicek ey gül-i ter bâd-ı kudûmun
Her gonce hemân kîse-i dînârını çözdi
5 Yahyâ diledi sarıla ana kemer-âsâ
Ol kâfir-i bed-kîş ki zünnârını çözdi
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
