Mef`ûlü fâ`ilâtü mefâ`îlü fâ`ilün
1 Ol dil-rübâ bezme gele nîm mest ola
Mânend-i cür`a gayrilerün kadri pest ola
2 Dil-berler içre `aşk ola ol nev-cevâna kim
Kadr-i mahabbeti bile `aşık-perest ola
3 Nerd oynaduk o şûh ile bir bûse kavl idüp
Ammâ didüm şu şart ile cânâ ki dest ola
4 Çeksün elin o serv-i revâna ulaşmasun
Şâh-ı çenâr gibi şu kim teng-dest ola
5 Hüşyârlık ümîdini eyler mi tâ ebed
Yahyâ ki mest-i bâde-i bezm-i elest ola
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
