Müstef‘ilün müstef‘ilün müstef‘ilün müstef‘ilün
1 Ol çeşm-i pür-efsûn ile dîvâne eylersüŋ beni
Ķorķum budur Mecnûn-śıfat efsâne eylersin beni
2 Ben dâġ dâġ ĥasretem ‘arż-ı tecellî eyleme
Bir bülbül-i nâlân iken pervâne eylersin beni
3 Nežžâre-i ĥayret yiter luŧf itme câm-ı la‘lüŋi
Câ’iz ki keşf-i râz idüm mestâne eylersin beni
4 Ol gûne gûne neş’e kim çeşmüm siyeh-mestüŋdedür
Peymâneveş ser-geşte-i mey-ħâne eylersin beni
5 Zaħm-ı teġâfülden śaķın Şehrî şikâyet eyleme
Ol âşnâdan ķorķarum bîgâne eylersin beni
Prof. Dr. Şener DEMİREL, ŞEHRÎ (MALATYALI ALÎ ÇELEBİ) DÎVÂN, ANKARA 2017
